Семинар за врзувачи на мушички
Месецот јануари е време кога мушичарите веќе на големо се подготвуваат и размислуваат за сезоната која е на прагот. Тоа е воедно и извонредно време за надополнување на кутиите со мушички со нови “адути” за следната сезона. Нестрпливоста расте, па токму поради тоа МК МАТКА, во својата програма предвиде одржување на краток семинар за врзување на мушички.
Како што беше и предвидено, така и се случи. Повторна средба на мушичарите, но овој пат со наслов “Врзување на мушички”.
Средбата се случи во одличниот амбиент на ресторан Фонтана во скопски Сарај.
Бројката повторно завидна, повеќе од 30 мушичари и повторно гости од соседните Косово и Србија. Одличната атмосфера и задоволство не изостанаа ни овој пат!
Настанот беше поделен во 3 дела:
- Презентација на врзување мушички од врвни врзувачи, пропратено со дискусија
- Изложба на мушички од познати врзувачи во Македонија и регионот
- Предавање на тема “Основи на етимологија”
Бидејќи средбата имаше карактер на краток семинар за врзување на мушички беа поканети истакнати врзувачи од Македонија како Игор Станчев, Трајко Божиновски и Стојан Вељаноски да презентираат врзување на мушички, а воедно тоа го сторија и гостите од Србија, Горан Каранфиловиќ - Кифла, како и гостинот од Косово, Бујар Сула. И овој пат настанот беше снимен од будната камера на “Ловечко Око”.
Со оглед на тоа дека имаше голем интерес, се бараше и место повеќе во ресторанот. МК Матка технички одлично го изведе настанот обезбедувајќи камера и ЛЦД проектор со што на гостите им се овозможи на екран да ги следат деталите од процесот на врзување на мушички.
Прв дел од семинарот
Сите презентери пред да пристапат кон презентирањето, најпрвин кажаа неколку збора за сопствените животни искуства како врзувачи и историјатот на врзувањето мушички во Македонија и регионот. Во тоа им помагаше претседателот на МК Матка, Мире Младеновски, кој воедно беше и модератор на настанот. Потоа се пристапуваше кон врзување на мушички и несебично објаснување на соодветните постапки, можните предизвици при врзувањето, како и препораки са користење на мушичките.
Најпрвин со своја креација се претстави Игор Станчев изработувајќи сува мушичка и стример. Тој несебично ги сподели своите искуства со присутните и одговараше на бројни прашања.
Потоа настапи Трајко Божиновски кој се претстави со врзување на “скакулец” и ги сподели своите сеќавања за времињата поминати со легендата на мушичарењето во регионот Андреа Урбан.
Како трет врзувач се претстави Стојан Вељаноски кој импресионираше со врзување на мушичка на рака, без употреба на стега, онака како што во минатото најчесто и се практикувало. Притоа не потсети на времињата кога недостигот на материјали и информации биле основен проблем во мушичарењето. Потоа демонстрираше врзување на мокра мушичка “професор”.
Горан Каранфиловиќ - Кифла се претстави со креација на парашут варијанта на сува мушичка. Неговата презентација беше извонредно прецизна и пропратена со коментари и детали кои се многу битни за секој почетник врзувач.
Бујар Сула импресивно бргу изработи маслинеста нимфа отежната со тунгстен и воедно ги информираше присутните за состојбите со мушичарењето на Косово, рибниот фонд, позначајни мушичарски води и сл.
Втор дел од семинарот
Во вториот дел од семинарот имавме можност да погледнеме мушички врзувани од истакнати врзувачи од регионот и Европа како Игор Станчев, Андрија Урбан, Саво Мартиновиќ и други.
Воедно се најде време и за размена и продажба на мушички, како и да се испроба новокупената опрема за мушичарење.
Трет дел од семинарот
Игор Станчев во манир на извонреден познавач на етимологија и мајстор на макро фотографијата одржа кратко предавање за најзастапените инсекти во Македонските води. Предавањето беше пропратено со Power Point презентација на која несебично ги сподели со присатните некои од своите есклузивни макро фотографии.
На крајот сите задоволни и исполнети од извонредниот настан се договоривме и потсетивме уште првиот ден на февруари кога ќе се отвори сезоната на Радика да се сретнеме на вода.
Дотогаш бистро!!!