Еднодневки (Ephemeroptera)

Мајска мушичка (Mayfly)

Еднодневките се веројатно најатрактивниот род на мушички, а засигурно најброен. Постојат бројни варијации на оваа мушичка која своето име го добила според должината на својот живот - еден ден. Понекогаш се случува нејзиниот живот да е нешто подолг или пократок , но сепак генерално се смета дека трае еден ден. Се појавуваат од пролет до есен и се најбројните водни инсекти кои ги среќаваме. Достигаат големина од 1 мм до 3 см.

Постојат бројни варијации на оваа мушичка според големина и боја и во основа се многу слични па тешко се разликуваат. Се разбира ова препознавање не важи и за оние со изострено око и нешто подлабоко познавање на нивните карактеристики.

Животниот циклус на еднодневките е многу интересен, пред се поради бројните трансформации кои ги доживуваат. Подолу ќе ги опишеме сите нејзини фази на трансформација:

​

Nymph (Ларва) - Nymph

Најголемиот дел од животот еднодневките ја имаат формата на ларва и како такви се наоѓаат на дното од реките прилепени за камења или гранки и претставуваат најчест оброк на менито на рибите. Во оваа фаза можат да се најдат многу долг период. Некои од нив и по повеќе години.

​

Subimago (транзициска фаза од ларва кон инсект) - Emerger

Ова е фаза на трансформација кога еднодневките "се пресоблекуваат", односно го отфрлаат кожурецот во кој се наоѓаат. Се одвојуваат од дното, го трансформираат своето тело од ларва кон мушичка и се упатуваат кон површината на водата. Воедно, овој краток пат од дното кон површината се наоѓаат на удар на салмонидните риби и тогаш се нивен најлесен плен. Самиот пат од дното до површината трае од неколку секунди до неколку минути, па и часови и пред се зависи од длабочината и брзината на водата, како и нејзината температура. Во оваа фаза нозете и крилјата сеуште не им се развиени, како ни нивниот колорит.

​

Imago (Развиен инсект ) - Dun

Ова е фаза кога еднодневката веќе се нашла на површината на водата и се трансформира во прекрасна мушичка со импресивни крилја. Притоа уште еднаш се "преслекува" за да го добие својот конечен облик. Крилјата, нозете и опашот се целосно развиени и мушичката може да полета. Животот на сега веќе зрелата единка трае најчесто еден ден. Немаат органи за варење и времето од еден ден го користат за размножување, по што угинуваат.

 

Spent (Угинат инсект) - Spinner

Фаза кога еднодневката угинува откако претходно се спарила и ги положила своите јајца на површината од водата, со што го продолжува циклусот на опстанок на својот вид. Се разбира, доколку дотогаш не се нашла како оброк на некоја риба.